سادس يوم في كوريا - 24/10/2012

طبعاً من هاليوم والبنات صاروا يتكسلون 

مايصحون بدري 

خرجنا ع الساعة 2 من الفندق 

وكان الجو جدا جميييل ويونس

فـ مشينا إلى محطة قانقام مخرج 8

ورحنا لـ Samsung De'Light 

جداً رائع هالمعرض 

فيه كل منتجات سامسونق 

والمكونات تبع هالمنتجات وكيف يصنعونها 

وكان فيه بلايستيشن كورة 

عاد هنا شهد وعهد استاانسوا ماصدقوا الشباب تركوها وراح يلعبون فيها 

وانا كنت أنتظر الرجال اللي ماسك لعبة السيارات أبي ألعبها 

بس أبد مو راضي يقوم منها 

قعدت أمشي من يمينه ويساره أبيييه يحس بس أبد مافيه احساس

وطلعنا فوق في الدور الثاني 

كانوا فيه هنود كثير جايين الظاهر دورة عندهم 

المهم ابوي شاف المرشدة يحسبها تشتغل هنا 

بس قالت له لا أنا جاية مرشدة لـ هالعمال 

المهم سولفنا معها عن المكان شوي 

وبعدين سألتنا قالت انتوا من وين 

قلنا لها من السعودية 

تونست عمرها ماشافت سعوديين 

وقالت وش اللي خلاكم تجون هنا 

عاد كلنا سوبر جووونير هههههههههههههههه

أبوي طفش قال مو كذا قولوا حابين نشوف بلدكم نتعرف عليها

سمعنا انها حلوه وبالفعل طلعت حلوه 

أما سوبر جووونير على طول 

عاد هنا جاااتنا الحمية نبي الناس اللي هناااك يعرفون قدر السوجو 

المهم راحت ولا شوي ترجع 

وتقول عادي أصوركم 

هنا كلنا نطالع في بعض 

شوي إلا بوي يقول عادي خذي راحتك 

وتصورنا ^___^

المهم 

بعد ماخلصنا مشينا على مبنى الكي بي اس

الطريق : Gangnam - Dangsan (change line ) - Assembly National Exit 4

من بعد ماتطلعون من مخرج 4 تمشون على طول إى نهاية الطريق يا تلف يمين ولا يسار
خذوا اليمين امشوا شوي راح تلاقون المبني يكون على يمينكم وتشوفون علامة KBS
أول ماتطلعون الدرج راح تشوفون الإذاعات وتشوفون مكان إذاعة سوكيرا

KBS 

هذا مبنى التي في وتقدرون تتفرجون على الردايو 

يعني تكون مرئية ومسموعة 

وكمان فيه معرض لنفس القناة من بدايتها إلى الان والتقنية اللي استخدموها في التصوير 

وكل الكلام 

طبعاً المعرض يقفل ع الساعة 5 ونص وأخر دخول مسموح على الساعة 5 

فـ كان المخطط 

إن  نوصل على الساعة 5 ونتفرج على المعرض بعدها نقعد برى 

ننتظر إلين مايبدأ برنامج راديو سوكيرا

عاد من حظنا الحلو يوم وصلنا لقينا المعرض مفقل 

أنا جداً زعلت <---والله إني هبله 

المهم وقعدت أتحلطم على شهد وعهد وأقول لو اننا خرجنا بدري من الفندق ماكان فاتنا ومن هالكلام 

عاد قعدنا في نفس مكان الراديو بس وقتها كان راديو ثاني 

فيها من جي أو دي توني 

عاد الرجال مادرينا عنه قااعد يسولف مع نفسه ههههههههه

المهم 

كانوا فيه وحدة من فيتنام

وثنتين كوريتين 

وأحنا بس 

كنا جالسين متفرقين ع الكراسي اللي قدام الاذاعة 

انا جالسة في الصف الثالث جنب أبوي 

وعهد وشهد جالسين قدامنا 

والبنات الكوريتين والفيتنامية جالسين قدام 

وكلن مشتغل على جواله 

*_________________*

وفي لحظة رفعت راسي بس عشان تعبت وأنا مرخيته 

ولا أشوووف شي قدامي داخل الاذاعة 

والله في البداية ما استوعبت 

قاعدة أشوف أقول في راسي هالشخص أعرفه ............ بس مين ؟؟؟؟؟؟؟

وربي مثل أفلام الكرتون اللي يوم تولع اللمبة

والله صار لي زي كذا 

وقفت وأنا أصرخ 

ليييييييتوك 

أبوي انفجع مسكني وقالي يابنت 

على طول جلست كأني قاعدة أستوعب إن أبوي جنبي 

ومسوية فيها العاقلة اللي مافي مثلي 

أبدأً ماقدرت أمسك نفسي 

وبعدها البنات هنا قااموا يصاارخون ويتجمعون جنب القزاز

وقمت أتسحب بشويش وأتقدم مع البنات 

عاد وقتها كان يسلم على المعدين والمعدات الموجودين في الاذاعة الظاهر هم نفسهم طاقم سوكيرا 

واحنا متجننااااااااات 

تيكيييي ليييتوك شوي نكسر القزاز 

وأبوي ماغير يقول 

والله مادرى عنكم ... يابناااتي حلوووقكم بعدين تعوركم ... ماهوا شايفكم 

واحنا ولا جنبه ماغير لاااصقين في القزاز 

المهم ماعبرنا ليييتوك دخل على المذيع وقعد معه يسوي الانترفيو الوداعي حقه 

واحنا هنا متجننااات 

عاد قعدنا نشووفه واحنا نرتجف 

جلسنا طبعا في المقعد الامامي 

وأشوف الفيتنامية تطلع ورقة وتكتب فيتناااام إلف 

قلت والله ماهي أحسن منا 

أقوم اسألها عندك ورقة قالت لا 

قمت شفت عندي ورقة طبعتها لمدينة الألعاب 

طلعتها وكتبت على الجهة الثانية وكتبت ( سعودي إلف عرب إلف )

بس أعطتنا الفيتناامية اللصق اللي نلصقه على القزاز 

عشان يشووفه 

وقعدنا ننتظر يخلص 

وقتها كان في واحد لابس نظارات ماغير يطالع فيني ويبتسم ابتسااامة شاااقة حلقه 

وأنا في بالي أقول وش يبي ذا 

وبس يمشي يمين يسااار 

وانا على بالي إنه معد من حقين طاقم الاذاعة 

بس ليييش هالابتسااامة اللي تشق حلقه 

يعني ما كنا جااييين لبرناامجهم 

لايكون فاهم الهرجة غلط

المهم طنشته 

وقعدت أسمع لـ تيكي 

ويوم خلص عاد قمنا ولصقنا في الشاشة وخلاص هو قاعد يودعهم 

ونصارخ ونأشر وأنا شغالة أصور 

وأبوي مستمر على موااااله 

والله ما درى عنكم ولاهو يمكم 

وخلاصص كان بيمشي 

هـــــنـــــــا

 جاء الرجال اللي كان يطالع فيني ابتساامة شاااقة الحلق مسك تيكي وقاااله 

الفااان رح سلم علييهم 

هنا عرفت انه مدييير اعمااالة 

والله ما كنت أدري ياانااس 

كااان مستااانس على شوووفة العرب 

ويبتسم ويطالع وأنا ماعبرته بس ابتسمت ابتسامة بااردة 

المهم جانا هنا

عندنا وقرأ الورقة وهز رااااسه 

وانحى لنا
و لف يطالع بعيون عهد تقريبا 5 ثواني و بعدين شهد بنفس المدة و بعدين فيني و الابتسامة مرسومة على وجهه و الغمازة محفورة :" 

ويأشر لنا 

يالله هذااك الوقت أحسها انه كان طوييل 

بعدها طلع

الورقة ماسكتها عهد والخط خطي $____$

عاد شفنا البنات الكوريات  راحو دخلوا من بوابة المبنى 

هنا شهد وعهد على طول ورااهم 

إلا أبوي هيييي انتي ويااه تعالو على وين رايحيين 

وأنا واقفة أشوف وش يصير خلااص ما أعرف وش اسوي 

عاد شهد وعهد ياابوي بنروح نسلم عليه عادي مافيها شي 

ابوي لا لا خلاص راح هو 

المهم عطلنا شوي بعدين قال طيب 

وعهد على طول انطلقت 

وابوي ماسكنا أنا وشهد لا لا ماينفع 

واحنا نقوله نبي ناخذ توقيعه 

وهو يقول لا مايصير 

أبوي خااف يضمنا ولا يسوي شي 

لان شااف تيكي يضم وحدة من المعدات 

يحسب انه راح يسوي كذا لاجينا عنده 

المهم عهد انطلقت وبعدها تصنمت 

قهرررررررررررررررررتني 

والله ابوي ماكان داري عنها 

بس ماسكنا انا وشهد 

وهي الهبلة رايييحة بالورقة وكان وقتها يوقع للكوريتين 

ويطالع فيها وهي مصنمة ماعاد تحركت 

شااف ما منها أمل قام راح وصار يودع T___T

ويوم راح قال ابوي خلاص راح ما ينفع <___< 

وبعدها صار يتلفت ويقول وين عهد ويوم شاافها 

قال وين رحتي قالت هناك 

قال هبّي ياااذي هههههههههههههههههههههههههههههههه

أول مرررره أسمعها في حياااتي من أبوي 

وربي فطست ضحك 

عهد :.
اصبروا بحكيكم شعوري يوم دخلت :""
اول ما قال ابوي يالله طيب ويمشي باقل خطوات وانا اروح داخل المبنى وهو يمشي بأقل من وقته ومعاه شهد وايناس
عاد ورقة ساودي الف ارب الف كنت انا اللي شايلتها ودخلت لين عنده تخيلوا لا قزاز ولا معدات بيننا :""" كم خطوه بس اخطيها ويصير مابينا شي كم خطوه واخمه بس !!
وصار يطالعني ويرجع يوقع للي معاه ويرجع يطالعني ويبتسم ويأشر بيده انا الخبله من كثر ما انا ماني مصدقه انه قدامي تنحت تصنمت صرت اتأمل فيه :""
وهو يناظرني كأنه يقول تعالي طيب ناديني اوقع لك بس ماراح ارفض وانا الخبله ساكته ومتصنمه !
الايدول الطبيعي يوم يوقع لوحده يناظر فيها ويوقع صح ؟ هذا يوقع ويطالع فيني انا اللي مالي دخل :"!!
فجأه حسيته يبي يحفظ ملامحي من كثر ما يطالعني :"
ويبتسم *شعور الدراما يوم يصير لهم جوهم لحالهم والخلق يتحركون من حولهم وهم يناظرون بعض* !
كذا كنا جديا :""""!!
كذا مشاعر ما ادري احس ما تنوصف صدق مهما بجلس اعبر ماراح تحسون كذا قلبي يدق يدق هذا اللي قبل اسبوع كنت اشوفه بفيديوهات بلابي امس بس كنت اشوفه من كم متر ب حفلة الذكرى والحين مابيني وبينه شي ومنتبه لي ويطالعني كان اول مره يشوف بنت :"""""
فكرة انه حافظ ملامحي تصيح :" فكرة انه مابينا شيء تصيح تجيب الرجفه :"
والمانجر نفسه يقوله يالله على السكوجل الثاني وهو يأخر نفسه ويوقع يحاول ينتظرني اناديه لاخر لحظه بس انا وش ؟
خبله هبله تنحه مريضه قليله :""""!!!!
ودي اقطع شعري على هالتناحه اللي تنحتها ذاك الوقت :""
وراح وهو يأشر لي ويبتسم للحين اتذكر هذاك الموقف وما انساه احسه فلم يتكرر بعقلي كل مااحد جاب هالطاري :"
خل اشوف وحده تجي تسفل بس هه1
وبس ماكأنه صاير شي لفيت على اساس برجع لابوي واخواتي واشوفهم توهم داخلين وابوي يتلفت ويدورني وامشي لهم بدون ملامح :"
اشوا اني تركتهم مع ابوي ورحت انا خخخخ كان للحين اتحسف ان هالموقف ماصار 
تعرفون انه ممكن يروح لاخوانه ويقول انا شفت سعوديات ؟
ممكن يتجمعون وهم يسولفون يقول شفتهم ويحكيهم عن الموقف ويوصف لهم ملامحنا :""
فكرة انه قال لهم عننا وان فيه ثلاث عربيات شفتهم بسوكيرا تعور القلب :""""""
واكيد سونغمين شاركه وقال شفتهم بعد :" يارب ياكريم ان هالموقف ينعاد يارب
ويوم رجعنا الفندق توي افطن ان صوري نزلت بما اني قريبه منه خخخخخخخخخخخخخ ونرتاع كلنا ونروح نجري للاب وندخل كل المدونات بس الحمدلله ما نزل لي شي ياي1
بس ترا لزمت على ايناس اني انا اكتب الموقف واحاول على الاقل اوصل لكم شي وتعرفون وش صار :""

..

وبس هذي سالفتنا مع تيكي 

بعدها رجعنا لمكاننا قدام الاذاعة 

وخلص مقدم الاذاعة وطلع قاعد يتكلم مع المعدات 

عاد هنا يوم شافنا صار يأشر لنا 

على باله فااان 

أنا ما أكرهه وأعرفه قد شفته في المسلسلات وقد شفته مع رين 

بس بعد تيكي جاااني تبلد وربي 

يوم يأشر لنا نطالع فيه انا وشهد ونرجع نبتسم ابتسامة باااردة ونأشره تأشيرة بسيطة 

وشهد ترجع لجوالها وأنا عيوني على صور الكاميرا اللي صورتها 

وهكذا مستمرين معه

وربي بعدين يوم قعدت افتكر السالفة حزنت عليييييه هههههههههههههه

عاد أبوي جلس داخل المبنى كان فيه كوفي بيرتاح ويتدفى

واحنا قاعدين مكاننا

الحين سوووكيرا 

وما أدرااك سوووكيرا 

تدروون إنه في نظام حجز الأماكن فيه واحنا ما ندري 

أدري أدري ماتعرفون مثلنا بالضبط 

الحين أقولكم وش صار 

طبعا بعد ماراح تيكي 

واحنا انثبرنا جالسين قدام الاذاعة 

طبعا

جااتنا الفيتناامية تقولنا ترى فيه حجز للأماكن 

عااااد هنا تقلبت عيوننا 

قلت معقووول لاا مايصييير 

والله ما ندري ترى أول مررره 

قالت مررره 

عاد سألتها كيف الحجز 

تقول من الساعة 12 الصباح مو الظهر هع هع

تحط ورقة بإسمها وتصور ولازم يكون فيه وقت التصوير 

عشان لو وحدة جات بعدها وصورت يشوف السكيورتي 

ويقول لا هذي قبلك هذي المكان لها 

عشان صورت قبلها 

قلنا طيب وش نسوي ؟؟

عاد قالت يمكن مايجون كثير 

عشان مافيه ضيووف 

عاد جلسنا ننتظر 

وأبوي راح يجيب لنا أكل بيشوف له مطعم قريب من المبنى

ما أكلنا من يوم مافطرنا 

عاد قلت له تبيني أروح أترجم لك يعني لا بغيت شي 

قالي لا مايحتاج بس انتبهي لخواااتك 

وكانت ع الساعة 7 

وجو عندنا مكسيكيات واسبانيات 

وجلسوا معنا يسوولفون ويهذروون 

وحكينااهم عن ليييتوك 

وشوي بعد تشوفنا سعودية ثاانية وتجي عندنا معها ولد اختها الظاهر 

يجنن ربي يسعده 

وأبوي جاء وجاب معه ساندويشز بالتونة الشي الوحيد اللي لقيه 

وكوفي 

الشي المفااجي 

اني شفت اسم Handel & Gretel 

المهم وشوي تجي صينية ومعها كرسي صغير

وشافت مكانها احد اخذه من الاسبانيات اللي جنبنا 

عاد الصينية ذي أخلااااقها خاااااااااااااااااااااااايسة جداً جداً جداً 

بمعنى الكلمة والله المشكلة كنا جنبها ربي رحمنا ماجات علينا 

(فائدة الكرسي عشان يوقفون عليه عشان يشوفون ويقدرون يصورون عليه )

المهم 

الأسبانية قالت لا ما راح اقوم...  مين قال انه فيه حجز ؟!!<-- تستعبط مع اننا قلنا لها XD

ورتها الصينية الصورة وهذيك مصممة انها ماتقوم من مكانها 

عاد اخذتها من قاصرها الصينية وراحت تنادي ع السكيورتي
أخذتها من قااصرها

وجاء الاجاشي وقال للأسبانية مايصير لازم حجز اذا احد حاجز قبلك خلاص راح عليك واذا ماحجز محد بيقولك شي

وهذيك تقااوح أبد تسوي نفسها ماهي فااهمة 

المهم تقووم الست هانم شهد وتتبرع بأنها تترجم للاسبانية 

وتقول للاجاشي قولي أنا أعرف كوري 

عاد هنا بدأ يقول لشهد مايصير لو أحد حجز المكان وصورها 

لازم تقوم من المكان وشهد ترجمت وقالت لها اللي قاله بالانقلش 

عاد هنا بعد استعبااط قامت الاسبانية وراحت 

عاد هنا قعدت تسولف مع الأجاشي شهد وتقوله 

طيب لو أحد جاء هنا وش نسوي 

قال تقومون قالت له حرام مايصير احنا من أول 

عاد سألها من وين انتوا قالت له احنا من السعودية 

عاد تونس وقال اول مره اشوف سعوديين 

وراح 

وشوي مانشوفه غير جاااي وجايب معه كرااسي ثنتين لنا عشان نجلس عليها 

وصارنا تقوله خلاص يعني نجلس ماراح نقوم من المكان 

قال لا لو جاء أحد راح أخذ الكرسي 

بس ما احد جاء والحمدلله قعدنا في مكاننا 

المهم  نبدأ مع سونقمين وريوووك 

دخلوا الشباب 

ياناااااااااس عليهم يجننون 

بس يومتها سونقمييين كانت أخلاقه قااافله 

ما أدري ليش ؟؟؟

المهم ولا عبر وشافنا ولا شي على طول جلس على مكانه 

وشهد كانت ماخذة الكاميرا ويوم كانت بتصور أول صورة 

طلع الفلاش وصاروا يطالعون فيها يقولون ممنوع الفلاش

والصينية اعطتها نظرة 

على طول رمت الكاميرا علي من الخرعة 

الصينية ذي نفسية وماغير تأفف وماهي شايفة أحد 

وغير كذا كانت تتفرج على مسلسل فااايث وبنفس الوقت تشوف الراديو 

أبد ماعجبتني مادخلت مزاااجي

وبدأ الراااديو 

ولصقنا ورقة سعودي إلف على القزاز عشان يشوفه
وكاان فيه مدير أعمال اللي مع سونقمين
ياااااربي سبحان الله عكس حق تيكي والله
ياازينه هذااك يجنن يعني يوم كان يودع الطاقم كان يقوله وهو شاقة الابتساامة رووح شوف معجبينك
وهذا حتى الابتساامة مايبتسم

مدير أعماله نفسية شافنا وبيسوي انه مابي اشوفكم وهو يمشي ويطالع ويمسك الالات ويطالع بنفسية 

المهم قعدنا نسمع الراديو وشوي نصور 

وأبوي مر علينا وشاف الزحمة وقعد ينادي علينا

طلعت له وقعد يقول وش ذا الزحمة قلت له الاذاعة بدأت 

وقال لنا ها متى تخلصون ؟؟ قلت له الاذاعة تخلص الساعة 12 

طالع فيني بنظرة يقول سلامات 

قلت لا بس خلاص الساعة 11 نمشي قالي طيب 

ورجعنا نكمل نشوف الاذاعة 

وجو ناس ما نعرفهم المهم وقعدوا معهم يسولفون ويغنون 

وشوي إلا ما ألاقي عيني تلاقت مع عينه 

هههههههههههههههههههههههه

والله ما أكذب ما كنت أصور كنت واقفة مقفله الكاميرا 

وجنبي الصينية هي وكاميرتها يوم شفت عدستها بطلت أصور 

قهر ليتني جبت العدسة اللي تسوي الزوم 

المهم 

وتلاقت نظراااتنا ع طول صحت ع البنااااات 

شوووفوا طالع فيني 

والله طالع فيني 

المهم 

طبعا أي حركة لفة ابتسامة أي شي يصير 

ماتسمعووون غير صياااح 

وفي مرة غلط سونقمين في حاجة ناسية وش هي 

المهم حط الاغنية وطلع لغرفة المعدين وصار يكلم المعد ويقوله

ماتسمعون وقتها غير ألالات التصوير تشك تشك تشك تشك تشك تشك تشك

وصيااااح 

من جد كأننا في الرد كاااربت 

هههههههههههههههههههههههههه

وبس وبعدها صارت الساعة 11 وجاء باباتي وقال يلا ياابنات 

عاد هنا ماكان ودنا نروووح 

وليتنا ماارحنا 

بس عاااد ما صار نصيب 

ورحنا من نفس طريقنا

ومرينا من عند هاندل اند قريتل
بس كان مقفل T______T

أول مرة نرجع متأخر كذا كان الميترو فاااضي قليل اللي فيه 

وأغلبهم سكااارى وربي 

أول مرة أشوف سكاارى من جد 

وفيييه واحد واااصل حده وربي يمشي وهو يترنح 

واحنا ماغير نهلوس في اللي صار لنا اليوم 

وهذاااك ماااشي يمين ويساار 

بعدنا عنه يكمل المسيرة حقته 

وشوي وقف عند كرسي وجلس عليه ينااام 

واحنا ننتظر القطار يجي 

يوم جااء القطاار ويقوم ابوي الشياااب ويدهل قلنا أهم شي مايكون عندنا ولا يمنا 

وربي يفجع ماهو داري عن نفسه 

بس الحمدلله مو نفس المقطورة 

وبكذا خلص يومنا ^____^